الاثنين ٢٤ يناير ٢٠١١
ابني العزيز نصر، صباح الفل يا حبيبي. النهاردة ميعاد صرف معاش محاربي أكتوبر فقفلت المحل ورحت، والله تعبت أوي يا نصر من المشوار ده، اصلهم نقلوه ٦ أكتوبر منهم لله، والمهم لقيته نقص وبقي ٢١٠ جنية! يعني رجلي وأيدي وعيني ب٢١٠ جنيه، يا بلاش! نصر يا حبيبي، أوعي تكون نسيت تحكي للي عندك ان أبوك من محاربي أكتوبر، واحكيلهم أني فجرت لوحدي ست دبابات مكاڤي وخلصت علي دوشمتين للصهاينة . بقلك ،النهاردة عمك بولس جابلي شوية بضاعة للمحل، كام خرطوشة سجاير علي شوية بسكويت وحلويات وبالالين ولعب صيني كله عمل ألفين جني، طبعاً اتخانقت معاه، نجيب منين ألفين جني، قال لي الدنيا لسه هتغلي واحنا أحسن نخزن شوية بضاعة. الراجل بينه كبر وخرف، قلت له يا راجل إحنا متأخرين في إيجار المحل علي الكهربا علي الضرايب ،ياله ربك يفرجها، تفتكر زعل اني قلتله انه خرف؟ الواد سعيد قالي بكرة فيه مظاهرة، فقلت له يجيبلنا كام صندوق ساقع علي كام كرتونة كانز وشيبسي. ربنا يفرجها بكرة ونعرف نلم إيجار الشهر المتأخر والكهربا. ياله أنا قفلت المحل وهادخل أنام بقي. تصبح علي خيريا نصر، الفاتحة لروحك يا بني.
الثلاثاء ٢٥ يناير ٢٠١١
ابني الغالي نصر، ازيك يا حبيبي ، مش عارف ابتدي منين يا نصر، النهاردة يوم طويل وعفش، من الصبح يابني والحركة جامدة علي الميدان. مظاهرة بقي من اياهم ، وعلي الظهرالزحمة اشتغلت، عيال وبنات بتاع ٢٠-٢٥ سنه ماشين في الشارع يهتفوا عايزين سيادة الريس قال إيه يمشي، شفت قلة الادب، قائد الطلعة الجوية و بطل الحرب ، سيادة الفريق، يمشي؟ يمشي يروح فين؟البطل اللي رفع رأسنا يمشي؟نهايته، بصراحة كنت قرفان منهم قوي،ومعرفتش برضك عايزين سيادة الريس يمشي ليه. هلكت والله يا نصر، شوية والأمن تسلم ايده دور فيهم الضرب، قلت بركة ماهو اللي ما ربهوش اهله الشرطة تربيه، نسيت أقولك افتكرتك بعد الظهر- وهو أنا يعني بانساك أبدا- لما جه واد شبهك- بس انت احلي أكيد- وطلب كاكولا يغسل بيها عينيه من الغاز المسيل بتاع الأمن، وحتت ثلج علشان طوبة جات في راسه، أنا كنت قرفان منه و منهم، بس اول ما بصتله ولاقيته شبهك- لا بس انت احلي- قلبي رق ورمتله التلجه. اهو كله بثوابه. أنا هأنام بقه، مافيش مرة تغلط وتجيلي في المنام؟واحشتني ياض،ربنا يقرب البعيد، ياله الحمدلله. الفاتحة لروحك يا إبني
الأربعاء ٢٦ يناير
العيال رجعوا يتظاهروا تاني والأمن ضربهم لما عدمهم العافية، يستاهلوا، أنا سمعتهم بيشتموا في سيادة الريس. وكل شويه ييجوا يشتروا كاكولا، هلكت منهم لله و عكاز رجلي كان هيموتني بس عملنا قرشين نسد بيهم الايجار. الواد اللي شبهك جه تاني هو وصاحبه اللي شبه صاحبك سمير الله يرحمه (سلملي عليه)، بالك اسمه إيه؟ مش هتصدق؛ ورحمتك اسمه نصر. تصبح علي خير يا حبيبي، الفاتحة
الخميس ٢٧ يناير ٢٠١١
الشباب رجعوا تاني النهاردة يا نصر. انا كنت هلكت بس الحمدلله عمك بولس جاب ابنه مينا يساعدنا ومحمد ابن خالك رأفت هو راخر جه فخدت كرسي أنا وبولس وقعدنا تحت الشجرة قدام المحل. اول مرة أخذ بالي من هتافاتهم كانوا بيقولوا "عيش حرية كرامة إنسانية" . إفتكرت كلامك لما كنت اقول لك ان البلد دي احسن من غيرها وانت تقولي يابا ازاي؛دا كرمتنا متهانه واللقمة بإهانة ، يا أبا مصر كرهانا. الشاب اللي شبهك جه تاني ومعاه صحبه اللي شبه صحبك المرحوم سمير. طلبوا حاجة ساقعة وجم قعدوا علي الرصيف جمبي يريحوا. كانوا عارقنين وفي راسهم جروح ودم ، فندهت الواد مينا يجبلهم شاش ومكركروم من اودتي ورا. شكروني وقعدنا ندردش، كنت عايز أملي عيني من الواد نصر اللي شبهك. قلت لهم عيب تشتموا سيادة الريس، ده بطل القوات الجوية ومفتاح النصر. حكتلهم عن الحرب واصابتي وقلت لهم عن الدبابات والدوشمة، فجاءة نصر ده سألني: وانت ليه حاربت يا ابو نصر؟قلت له علشان كرامتنا كانت متهانه وأرضنا كانت مغتصبة، فقالي طب والنهاردة؟كرامتنا فين؟سكت يا نصر ، ماهي كرامتنا زي ما انت قلت من زمان ياحبيبي. ،وسألني يا بو نصر لما يصدر الغاز ببلاش لإسرائيل واحنا مش لاقين، ويبيع الارض ببلاش للمستثمرين واحنا جعانين، ويسيب عيالنا تهج وتغرق في البحر من البطالة و يستورد عمال صينيين، ولما يسها عن نهر النيل لحد ما يخدوه مننا ونصبح عطشنين، ويحاصر ويجوع ويموت في إخوانا الفلسطنيين واحنا ساكتين ،مش كده نبقي يا ابو نصر مغتصبين؟
الواد كلامه حلو زيك يا نصر، قلتله بس ما يصحش نشتم في الريس، فقالي وهو مين جاب زكي بدر وعبيد والشاذلي، وعز وجمال وشهاب وسرور وصفوت والعادلي، وصدقي وسلامه وابراهيم سليمان والجبلي ،وغالي وفاروق وهلال وعزمي ،وعلاء والغريب ووالي ويوسف عبدالرحمن وهاني سرورو ممدوح اسماعيل وسالم وحسني؟ ومين ولع في القطر وغرق العبارة وسمم الخضار وباع المصانع ونهب البلد وسكنا المقابر ؟
سكت الجدع شوية وبصلي وقال لي: ابنك نصر فين يا أبو نصر؟مش كان أول دفعته في الهندسة النووية؟ مين اللي حاطه في مركب طالعه علي ايطاليه؟ مين سابه يغرق هو وسمير في وسط الميه؟ مين ما دورش حته علي جتته وسابك تدفن نظارته المرميه؟ يا أبو نصر فتح عينيك و عقلك، ، قبل الطوفان ما يغرق مصر.
إستأذن الشاب هو وصاحبه ودخلوا وسط المظاهرات تاني. وشوية والأمن رجع يضرب فيهم إيشي بالقنابل وإيشي بالرصاص والمدرعات بقت بتدهس فيهم وتدوسهم زي الفراخ، بسرعة جريت علي جوه والولاد لموا البضاعة وقفلت باب المحل ودخلت اترميت علي السرير جوه. تفتكر يا نصر كلام الجدع نصر ده حقيقي؟ يعني سيادة الفريق وقائد الطلعة ومفتاح النصر هو اللي قتلك؟رد علي يابني أنا هتجنن. أنا طول عمري بقول الريس بطل والوزراء همّ سبب البلاوي، لكن اول مرة آخد بالي ان الوزرا اللي بيعينهم الريس يبقي الريس هو ....، استغفر الله العظيم، نهايته أنا هانام يا نصر ، الفاتحة لروحك يا حبيبي
السبت ٢٩ يناير ٢٠١١
سامحني يانصر ماكتبتلكش امبارح. مش عارف أقولك إيه ولا ابتدي منين. اليوم بدا هادي ، صليت الجمعة آدام المحل ويدوبك خلصنا القيامة قامت، من كل حته ناس زي النمل كلها علي كلمه واحدة الشعب يريد إسقاط النظام، لقيت نفسي يقول معاهم يا نصر، ايوه أبوك بطل اكتوبر بيهتف يسقط السيد الفريق حسني مبارك رئيس الجمهورية. العدد قعد يزيد وشوية ولاقيتلك الأمن مدور الضرب في الناس، بيضربوا بالرصاص الحي يا نصر! والله يابني بالرصاص الحي، مادريتش بنفسي الا وانا بصرخ فيهم يا كفرة إحنا مصريين مش صهاينه يسقط يسقط حسني مبارك. الناس شالوني وبقيت بهتف معاهم لحد ما قنبله دموع نزلت جمبنا، فالناس جريت، اللي شايلني جري بي والعساكر ومعاهم ظابط جريوا ورانا ، بس الواد وقع ووقعت انا روخر والعساكر مسكوني وجه الضابط بصلي وراح بالشلوت ضاربني في بطني ولسه بيرفع كفه يضربني بالقلم رحت ضارب ايده بالعكاز، الكلب اتجن وبدا يضرب في هو والعساكر غمضت عينيه وقلت الحمدلله يبقي انا جايلك يا حبيبي، فجاءة وقف الضرب، فتحت عيني لاقيت الشاب نصر وصاحبه اللي شبه المرحوم سمير ومعاهم بيجي عشرين جدع بيضربوا في الضابط والعساكر، العساكر هربت والضابط كمان طلع يجري، نصر ادور وجه علي يشيلني وهو بيقولي :" إحنا ولادك وفداك يابو نصر يا بطل"، من وراه شفت الضابط وقف جري وإدور لنا، فجأة سمعت صوت طلقة ، ببص لنصر لاقيته بيبصلي وبيضحك ، بس الدم طالع من راسه زي النفورة ،و في ثانيه، وقع علي الارض، زحفت عليه اضمه في صدري، بس كان خلاص. شهيد زيك يا نصر، شهيد، دور يابني عليه عندك، الشهدا اللي زيكو احياء عند ربهم يرزقون. الجدعان شالوني وشالوه وجروا بينا علي المحل، قلتلهم ينيموا نصر علي سريري لما نبقي ندفنه في مقبرتك، ماهي فاضية يا نصر، الله يرحمك ويرحمه. طلعت ابص علي الولاد برة، لاقيت الأمن مشي، والناس في الميدان بتغني وتضحك، ومن بعيد شفت دبابات ولادي ، جريت بعكازي عليهم، حضنتهم وبوست صاج الدبابه. الأمن كان مشي والجيش نزل والثورة نجحت يا نصر. بالليل الناس باتت في الميدان، وانا معاهم. من بعيد شفت مبني الحزب الوطني مولع، واحد قال المتحف بيتسرق، جريوا الجدعان و الستات و راحوا يحموه. النهاردة المظاهرات كملت بس في حراسة ولادي من الجيش، كلاب الامن اللي قتلوا اخوك نصر مشيوا من كل حته. رحنا دفنا نصر ورجعنا المغرب، الجيش كانوا عاملين حظر تجول لكن اول ما ولادي كانوا يشفوني بيعدونا، علي نص الليل، لاقينا المخبرين جايين يولعوا في المحلات ويسرقوها. عمك بولس مسك عوض المخبر قبل ما يولع في المحل وانا جواه. سألته وانت عرفت إزاي يا بولس قالي "العدرا قالت لي إلحق أخوك" ففهم اني في مشكله.تخيل الواد عوض اللي مقضيها شكك مني يعمل كده؟ بيقول أوامر. الحمدلله. الفاتحة لروحكم يا نصر ،
الأحد ٣٠ يناير ٢٠١١
أحبائي نصر، يارب تكونوا اتلاقيتم. يلا سلوا بعض علي ما أجيلكم يا ولادي، بس يا نصر ماتنخعش علي اخوك نصر قوي في موضوع الدبابات المكاڤي، أما اصلي قلت له انهم ٣ بس، وبولس كان قاعد فماجبتش سيرة الدوشم، ما انت عارف ان بولس هو اللي فجرهم و طير فيها عينه. المظاهرات شغالة، رحت لولادي في الجيش بالاكل والسجاير، و عملنا قعدة سمر علي الدبابة. والله حاسس ان النصر قريب ياولاد. الفاتحة لروحكم يا حبايبي
الإثنين ٣١ يناير ٢٠١١
مسا الفل علي عيونكم يا ولاد. أمك جاتلي في المحل يا نصر٢ النهاردة. دي مدرسه زي أم نصر مراتي، نصر مش فاكرها اصلها ماتت وهي بتولده بس أمك شبهها الخالق الناطق. هي قاعدة هنا في الميدان لحد ما يغور اللي ما يتسمي سياده الريس. حكيت لها عن بطولتك و استشهادك، بكت فطمنتها انك مع نصر، فضحكت. ما تخافش عليها يا نصر، تريزا مرات بولس أخدتها تبات عندها و ربنا يابني يقرب النصر. النهاردة قالوا فيه حكومه جديدة، تخيل ؟فرعون مش مصدق ان الناس طردوه. ربك كريم وان شاء الله دمك يا نصر مش هيروح هدر، والواد الضابط صورته محفورة في مخي، وغلاوتك ما هسيبوه. بكره بيقولوا هنبقي مليون في الميدان. بت مذيعة من السي إن إن جات رطنت معايا، قلت لها " زي بيبول دونت ونت مستر مبارك زي صن أوف دوج إني مور. بليز تيل هيم أبو نصر هيتز يو". الواد محمود قلها كلام ابيح قوي عن سياده الريس بالانجليزي بيقول سمعه في فيلم من اياهم علي النت، خلي البت وشها احمر!! ربك يسهل وفرعون ربنا يهده، الفاتحة علي روحكم يا ولادي.
ليست هناك تعليقات:
إرسال تعليق